Mama Salma Kikwete azindua mpango maalum NHIF

Mkurugenzi Mkuu wa NHIF, Emanuel Humba akitoa maelezo ya mfano wa kitambulisho cha matibabu kwa Mama Salma Kikwete ambaye alikuwa mgeni rasmi katika uzinduzi wa huduma za bima ya afya kwa vikundi vya Wajasiriamali.

Mmoja wa wanufaika wa huduma mpya ya bima ya afya apokea kitambulisho cha matibabu kutoka kwa mgeni rasmi.

Waziri wa Afya na Ustawi wa Jamii, Dk. Hussein Mwinyi akimkabidhi Mama Salma Kikwete tuzo ya ushujaa wa mwaka 2012 kwa juhudi zake binafsi za kuwaunganisha zaidi ya akina mama 200 na huduma za Mfuko wa Taifa wa Bima ya Afya.

Mama Salma Kikwete akizindua rasmi huduma ya bima ya afya kwa vikundi vya wajasiriamali, kushoto ni Waziri wa Afya na Ustawi wa Jamii akishuhudia.



Desemba 20, 2012, Mwenyekiti wa Taaisisi ya Wanawake na Maendeleo (WAMA) Mama Salma Kikwete alizindua rasmi huduma ya bima ya afya kwa vikundi vya Wajasiriamali.

Katika uzinduzi huo, Mama Salma Kikwete aliwataka wanavikundi hao wanaotarajiwa kuanza mara moja kunufaika na huduma za bima ya afya kuitumia huduma hiyo kwa mujibu wa taratibu zilizowekwa.

Aidha aliwataka wanachama wote kwa ujumla kuwa walinzi wa huduma zitolewazo na NHIF lakini pia kutoa taarifa wanapokutana na lugha mbaya za watoa huduma wakati wa kupata huduma za matibabu.

Uzinduzi wa huduma hiyo umefungua milango kwa vikundi mbalimbali vya wajasiriamali nchini kuweza kujiunga na bima ya afya ili wawe na uhakika wa kupata matibabu wakati wowote.

Akitoa maelezo ya awali Mkurugenzi Mkuu wa NHIF, Emanuel Humba alisema kuwa wanawake ni moja ya kundi lenye nguvu na linalobeba familia nyingi katika huduma mbalimbali hususan za afya.

Alisema kuwa mpaka sasa wanawake wachangiaji waliopo katika Mfuko wa Taifa wa Bima ya Afya ni asilimia 41 ya wanachama wachangiaji wote na hii inaonesha ni jinsi gani wanawake walivyo na nchamgo mkubwa ndani ya jamii.

Dk Mwinyi alivyotembelea miradi ya uwekezaji ya NHIF

Mkurugenzi wa Fedha na Uwekezaji, Deusdedit Rutazaa akisoma taarifa ya utekelezaji wa miradi ya uwekezaji inayotekelezwa na Mfuko wa Taifa wa Bima ya Afya katika Chuo Kikuu cha Dodoma na Hospitali ya Rufaa Dodoma.

Naibu Waziri wa Afya na Ustawi wa Jamii Dk. Seif Rashid (Kati kati) akibadilishana mawazo na Mkurugenzi Mkuu wa Mfuko wa Taifa wa Bima ya Afya (NHIF) Emanuel Humba kabla ya ukaguzi wa miradi ya vituo vya kisasa vya uchunguzi wa magonjwa vilivyoko mkoani Dodoma.

Mkurugenzi Mkuu wa NHIF, Emanuel Humba akisalimiana na Naibu Waziri wa Afya na Ustawi wa Jamii.

Waziri wa Afya na Ustawi wa Jamii Dk. Hussein Mwinyi akizungumza na uongozi wa NHIF baada ya kukagua miradi iliyowekezwa na NHIF mjini Dodoma, kulia ni Mwenyekiti wa Bodi ya NHIF, Deogratius Ntunkamazina.

Viongozi wakielekea kukagua mradi uliopo UDOM

Waziri wa Afya na Ustawi wa Jamii akiwa na Mkurugenzi Mkuu wa NHIF baada ya kukagua mradi.

Ukaguzi ukiendelea

Mkurugenzi Mkuu wa NHIF akionesha namna ujenzi unavyoendelea.

NHIF yamuenzi kipekee Mwl Nyerere

Hayati Baba wa Taifa Mwl, Julius Nyerere

Mkurugenzi Mkuu wa NHIF, Emanuel Humba.

Na Grace Michael

KATIKA kuhakikisha Baba wa Taifa Hayati Mwalimu Julius Kambarage  Nyerere anaenziwa kipekee, Mfuko wa Taifa wa Bima ya Afya (NHIF) unaendesha zoezi la upimaji afya za wanachama na wananchi kwa ujumla mkoani Shinyanga ambako kilele cha maadhimisho hayo yatafanyika Oktoba 14, mwaka huu.

Akizungumzia zoezi hilo, Mkurugenzi wa Uendeshaji Eugen Mikongoti alisema kuwa, Mfuko umefikia uamuzi huo kwa lengo la kuenzi mazuri yote yaliyofanywa na Baba wa Taifa enzi za uhai wake.

“Baba wa Taifa aliapa kupigana na maadui watatu ambao ni Umasikini, Ujinga na Maradhi na katika hayo sisi ni wadau wakubwa katika kupambana na adui maradhi na ndio maana tumeona tumuenzi kwa njia hii ambapo wananchi watapima afya zao bila malipo na kupata ushauri wa kitaalam ili kuepukana na maradhi yasiyoambukiza,” alisema Mikongoti.

Mbali na upimaji wa afya kwa wananchi, alisema kuwa Mfuko unatumia fursa hiyo kujibu kero mbalimbali za wanachama wake ambao watafika katika viwanja vya Sabasaba ambako Mfuko umeweka banda kwa ajili ya kuendesha zoezi la upimaji na utoaji wa elimu juu ya Mfuko wa Taifa wa Bima ya Afya na Mfuko wa Afya ya Jamii, kwa muda wa siku tano, kuanzia jana.

Alisema kuwa lengo kubwa la NHIF ni kuhakikisha wanachama wake na wananchi kwa ujumla wanapata huduma bora za matibabu na Vituo vya kutolea huduma hizo vinaboreshwa kwa kuwa na vifaa vya kisasa vya uchunguzi kupitia fursa inayotolewa na Mfuko huo ya mikopo ya vifaa tiba na ukarabati wa majengo.

“Mfuko umekuwa na jitihada mbalimbali za kuhakikisha huduma za afya vituoni zinakuwa bora na unafanya hivyo kwa kutambua kuwa mhimili mkubwa wa Mtanzania katika kufanya kazi na kujiondolea umasikini ni afya yake kwanza…nawaomba wananchi wa Shinyanga na wa maeneo mengine mfike katika banda letu ambalo linatoa huduma za upimaji na elimu ya afya kwa ujumla,” alisema.

Mikongoti alisema kuwa Mfuko utaendelea kumuenzi Baba wa Taifa katika kupambana na adui maradhi kwa kuhakikisha Watanzania wanakuwa na uhakika wa matibabu kupitia utaratibu wa kujiunga na Mfuko wa Taifa wa Bima ya Afya na Mfuko wa Afya ya Jamii.

Wakati huo huo, Mfuko umeendelea na jitihada zake za kuhakikisha makundi maalum yanapata huduma bora baada ya kuchangia jumla ya shilingi milioni 1.5, shuka 80 na fulana 80 kwa Kituo cha Mihuji Chesire Home kilichopo mjini Dodoma ambacho kinalea watoto wenye matatizo ya mtindio wa ubongo.

Mchango huo wa NHIF ulitolewa mwishoni mwa wiki iliyopita mjini Dodoma katika harambee ya kuchangia kituo hicho na Meneja wa Kanda ya Kati Dkt. Daudi Bunyinyiga ambaye alimwakilisha Mkurugenzi Mkuu wa Mfuko huo Emanuel Humba.

Akiwasilisha mchango huo, Dokta Bunyinyiga alisema kuwa Mfuko kama Taasisi inayofanya kazi na Jamii inawajibu wa kuhakikisha jamii inayoizunguka hususani watu wenye mahitaji maalum wanafaidika na huduma zake.

Ongezeni kasi ya uhamasishaji CHF-RC Lindi

Maandamano ya siku ya Afya ya Akili mkoani Lindi, wa tatu kutoka kulia ni Mwakilishi wa Mfuko wa Taifa wa Bima ya Afya Fortunatha Kulaya

Mkuu wa Mkoa wa Lindi, Bw. Mwananzila akitia saini katika kitabu cha wageni kwenye banda la elimu la NHIF ambalo lilikuwa katika maadhimisho hayo, kushoto ni Meneja wa Kanda ya Mtwara, Joyce Sumbwe.

Na Mwandishi Wetu

MKUU wa Mkoa wa Lindi, Ludovick Mwananzila amewataka viongozi mkoani humo kwa kushirikiana na Ofisi ya Mkoa ya Mfuko wa Taifa wa Bima ya Afya (NHIF) kuhakikisha wanaongeza kasi ya uhamasishaji wa wananchi kujiunga na Mfuko wa Afya ya Jamii (CHF) ili wananchi wawe na uhakika wa kupata matibabu.

Rai hiyo aliitoa mapema wiki hii katika maadhimisho ya siku ya siku ya Afya ya Akili Duniani. Alisema “Hakikisheni kasi ya uhamasishaji inaongezeka na wanachi  wengi wanajiunga kwenye mfuko huu wa CHF, haiwezekani kwa mkoa wa Lindi uwe na  wanachama asilimia 5.4 % tu kati ya kaya 194,424,” alisema.

Katika maadhimisho hayo, Mfuko ulishiriki kikamilifu katika utoaji wa elimu ya namna ya kujiunga na utaratibu wa Mfuko wa Taifa wa Bima ya Afya na Mfuko wa Afya ya Jamii ambapo mpaka sasa mifuko hiyo inahudumia asilimia 18.7 ya Watanzania wote.

Hata hivyo Mkuu huyo wa Mkoa alitumia fursa kuwataka viongozi mkoani humo kuhakikisha wanajipanga katika kukabiliana na changamoto za huduma za matibabu  zilizopo kwenye mkoa hususani ya uhaba wa dawa katika vituo vya kutolea matibabu.

Kwa upande wa NHIF, akizungumzia maadhimisho hayo, Mwakilishi wa Mkoa wa Lindi,  Fortunata Kulaya alisema changamoto kubwa iko kwenye matumizi ya fedha zinazolipwa na mfuko huo hususan za tele kwa tele hivyo akaomba eneo hilo kuangaliwa kwa jicho la pekee ili fedha hizo ziweze kutumika katika matumizi yaliyokusudiwa.

 

NHIF yasogeza huduma, yazindua ofisi mpya tisa

Mkuu wa Mkoa wa Pwani, Mwantumu Mahiza akisisitiza jambo kwa uongozi wa NHIF kwenye uzinduzi wa ofisi mpya ya Mfuko huo iliyoko Kibaha.

Mkurugenzi Mkuu wa NHIF akitoa maelezo ya awali kabla ya uzinduzi wa Ofisi hiyo.

Mkurugenzi wa Taasisi ya Elimu Kibaha Dk. Mpemba akitoa neno la shukrani kwa uongozi wa Mfuko katika uboreshaji wa huduma za matibabu.

Baadhi ya Maofisa wa Mfuko na wageni waalikwa wakisikiliza kwa makini

Wakibadilishana mawazo namna ya uboreshaji wa huduma za matibabu mkoani Pwani

Baadhi ya Wakurugenzi wa NHIF wakibadilishana mawazo kabla ya kuanza kwa hafla ya uzinduzi wa Ofisi hiyo.

Maofisa waliokuwa wakiandaa shughuli hiyo.

RC Mahiza aziundua ofisi mpya za NHIF

MKUU wa Mkoa wa Pwani, Bi. Mwantumu Mahiza ameutaka Mfuko wa Taifa wa Bima ya Afya kuisaidia kwa hali na mali Hospitali ya Tumbi kutokana na umuhimu wake katika kuhudumia wagonjwa mbalimbali wakiwemo majeruhi wengi wa ajali zinazotokea katika maeneo ya mkoa huo.

Alisema kuwa kutokana na changamoto nyingi zinazoikabili Hospitali hiyo ikiwemo ya kuwa na idadi kubwa ya wagonjwa kwa siku, ukosefu wa Vifaa vya kisasa vya uchunguzi, kuna haja kubwa kwa NHIF kuingilia kati ili kuinusuru hospitali hiyo na maisha ya Watanzania kwa ujumla.

Bi. Mahiza aliyasema hayo jana katika uzinduzi wa Ofisi mpya ya NHIF iliyopo mkoani Pwani ambayo iliwakilisha Ofisi zingine mpya nane zilizopo katika Mikoa ya Mara, Kigoma, Ruvuma, Rukwa, Singida, Lindi, Shinyanga, Kagera na Manyara ambazo zimefunguliwa na NHIF kwa lengo la kusogeza huduma kwa wanachama wake na kuboresha huduma kwa ujumla.

“Nimefarijika sana kwa kutupa heshima kubwa Mkoa wa Pwani, mngeeamua kwenda Mkoa mwingine kuzindua ili kuziwakilisha ofisi zingine, Niwaombe sana wenzangu NHIF, mtupe umuhimu wa kipekee katika kutusaidia vifaa tiba na hasa kifaa cha kutunzia damu salama, inashangaza na haieleweki kwa wasomi kama sisi kuona ajali na wagonjwa wakiwa Pwani na damu ikitunzwa Dar es Salaam...nakuagiza Mganga Mkuu wasilisha ombi hilo NHIF haraka iwezekanavyo,” alisema Mahiza.

Alisema kuwa suala la vifaa vya uchunguzi katika hospitali hiyo linamnyima usingizi kutokana na mazingira yanayoikabili hospitali hiyo ambayo kwa wastani inapokea wagonjwa 500 kwa siku.

Akijibu ombi hilo la Mkuu wa Mkoa, Mjumbe wa Bodi ya NHIF, Bi. Mwanaidi Mtanda alisema kuwa Bodi itahakikisha inatoa kipaumbele katika suala hilo kwa lengo la kuwezesha hospitali hiyo kuwa na vifaa vya kisasa ili huduma bora kwa wanachama na wananchi kwa ujumla zipatikane.

“Kwa niaba ya Bodi niseme kuwa Mfuko una nia ya dhati ya kusaidia Hospitali ya Tumbi na Mkoa wa Pwani kwa ujumla kwa lengo la kuboresha huduma na pale tutakapopokea maombi kutoka kwenu yatafanyiwa kazi haraka sana,” alisema Bi. Mtanda.

Bi. Mtanda hakusita kusema kuwa hamasa ya utumiaji wa fursa inayotolewa na NHIF ya utoaji wa mikopo ya vifaa tiba na ukarabati wa majengo kwa vituo hasa vya serikali bado ni mdogo hivyo akatumia fursa hiyo kuwaomba viongozi na wamiliki wa vituo vyote vya matibabu vilivyosajiliwa na Mfuko kuomba mikopo hiyo ili kuviwezesha vituo vyao kutoa huduma bora za matibabu.

Hata hivyo, Bi. Mwantumu alieleza wazi kuwa NHIF imekuwa chachu kubwa katika maendeleo ya sekta ya afya kutokana na ukweli kwamba vituo vingi vinaendesha shughuli zake kwa kutumia fedha zinazolipwa na Mfuko huo.

“Mtu yeyote anayefuatilia mwenendo wa Sekta ya Afya nchini atakubaliana nami nikisema Mfuko wa Taifa wa Bima ya Afya, umekuwa chachu kubwa katika maendeleo ya sekta ya afya kwani kwa kiwango kikubwa vituo vingi vinaendesha shughuli zake kwa fedha zinazolipwa na Mfuko huo hivyo nawapongeza na kuwataka muendelee kusaidia,” alisema.

Kwa upande wake Mkurugenzi wa NHIF, Bw. Emanuel Humba alisema kuwa lengo la uzinduzi wa ofisi hizo ni kutaka kuwajulisha wadau kuwa Mfuko umesogeza huduma zake karibu na wanachama ikiwa ni njia mojawapo ya uboreshaji wa huduma.

Alisema pamoja na Mfuko huo kukua kwa kasi na kuwa na mafanikio makubwa lakini bado unakabiliwa na changamoto mbalimbali zikiwemo za ukosefu wa dawa, vifaa tiba, upungufu wa wahudumu changamoto ambazo Mfuko unazifanyia kazi kupitia mipango mbalimbali ikiwemo ya kusajili maduka ya dawa muhimu na ukopeshaji wa vifaa tiba.

NHIF kwa sasa ina mtandao wa ofisi zake katika Mikoa yote Tanzania Bara na Zanzibar isipokuwa mikoa mipya.

Dk. Mwinyi afanya ziara NHIF

Mkurugenzi Mkuu wa Mfuko wa Taifa wa Bima ya Afya, Emanuel Humba akiongozana na Waziri wa Afya na Ustawi wa Jamii, Dk. Hussein Mwinyi na wajumbe wa Bodi kukagua miradi ya Mfuko huo.

Mkurugenzi Mkuu wa NHIF, Emanuel Humba akitoa maelezo ya moja ya miradi ya Mfuko huo kwa Waziri wa Afya na Ustawi wa Jamii, Dk. Hussen Mwinyi.

Mkurugenzi wa Uwekezaji na Fedha, Deusdedit Rutazaa akitoa maelezo ya Mradi kwa Waziri na viongozi wengine wa Mfuko.

Waziri wa Afya na Ustawi wa Jamii, Dk. Hussein Mwinyi akitoa maelekezo kwa viongozi wa Mfuko wa Taifa wa Bima ya Afya kuhusiana na miradi iliyowekezwa Makao Makuu ya Mfuko huo.

Makamu Mwenyekiti wa Bodi ya Mfuko wa Taifa wa Bima ya Afya, Ally Kiwenge akitoa salaam za Bodi kwa Waziri wa Afya na Ustawi wa Jamii.

Waziri wa Afya na Ustawi wa Jamii akizungumza na wafanyakazi wa Mfuko wa Taifa wa Bima ya Afya alipofanya ziara makao makuu ya Mfuko huo leo.

Baadhi ya Wajumbe wa Bodi ya Mfuko wa Taifa wa Bima ya Afya (walioko mbele) wakisikiliza kwa makini maelekezo ya Waziri wakati akizungumza na wafanyakazi.

Wafanyakazi wakisikiliza kwa makini maelekezo ya Waziri wa Afya na Ustawi wa Jamii.

Wafanyakazi wa Mfuko wa Taifa wa Bima ya Afya wakimsikiliza Waziri wa Afya na Ustawi wa Jamii alipofika kwa lengo la kuzungumza nao.

Kuna haja ya kuwa na mdhibiti huduma za afya-Dk. Mwinyi

SERIKALI imesema kuna haja ya kuwepo kwa chombo maalum cha kudhibiti mfumko wa bei katika sekta ya afya kwa lengo la kuwawezesha wananchi wake kupata huduma hizo bila kuwepo kwa vikwazo vya gharama kubwa.

Hayo yamesemwa na Waziri wa Afya na Ustawi wa Jamii, Dk. Hussein Mwinyi wakati akizungumza na wafanyakazi wa Mfuko wa Taifa wa Bima ya Afya (NHIF) alipotembelea Makao Makuu ya Mfuko huo.

Hatua ya Dk. Mwinyi kusema hayo ilitokana na ombi la Wafanyakazi hao kupitia Mwenyekiti wa Tawi la Chama cha Wafanyakazi (TUGHE), Baraka Maduhu, ambaye alisema kati ya mambo yanayowanyima faraja wafanyakazi wa Mfuko huo ni pamoja na mfumko holela wa gharama za matibabu.

“Pamoja na mafanikio makubwa ambayo Mfuko umeyafikia lakini bado kuna vikwazo ambavyo sisi kama wafanyakazi wa Mfuko vinatunyima faraja likiwemo la upandishwaji holela wa gharama za matibabu hatua itakayowafanya Watanzania na Mfuko kwa ujumla kushindwa kumudu gharama hizo hivyo ombi hili tunalileta kwako,” alisema Mwenyekiti wa TUGHE.

Akijibu hoja mbalimbali ambazo ziliwasilishwa kwake kama kero za wafanyakazi wa Mfuko, Dk. Mwinyi alikubaliana na ombi hilo na kusema kuna haja kubwa ya kuwepo kwa chombo hicho ili kiweze kulinda walaji kwa kuwa suala la kupata huduma za matibabu kwa mwananchi ni suala nyeti linalogusa maisha ya mwananchi moja kwa moja.

Kutokana na hali hiyo, Waziri alisema kinachotakiwa kufanyika kwa sasa ni kupata maoni ya wadau mbalimbali wa sekta ya afya ili kuangalia namna ya utekelezaji wake.

Katika hatua nyingine Dk. Mwinyi aliupongeza Mfuko wa Taifa wa Bima ya Afya kuwa ni moja ya Taasisi ambayo iko chini ya Wizara yake inayofanya vizuri katika utekelezaji wa shughuli zake.

“Mkifanya vizuri tunapaswa kuwaambia na mnapokosea ni lazima tuwaonye lakini ninachoweza kusema kwa sasa ni kwamba uongozi na wafanyakazi kwa ujumla mnafanya vizuri hivyo ongezeni bidii ili kufikia malengo mliyoyaweka nay a Serikali kwa ujumla,” alisema.

Akizungumzia suala kuwepo kwa chombo maalum chini ya wizara kitakachodhibiti ubora wa huduma zinazotolewa na Bima za afya zikiwemo za binafsi na serikali kama zinakidhi kiwango cha ubora wa huduma ikilinganishwa na michango ya wanachama, Dk. Mwinyi alikubaliana na wazo hilo na kusema kuna haja ya suala hilo kuwa chini ya wizara ili liweze kuwa na usimamizi mzuri.

“Pamoja na suala hili kuwa chini ya Wizara ya Fedha ambayo inaangalia bima kwa ujumla wake lakini masuala ya afya ni masuala nyeti na yanayotakiwa kuangaliwa kipekee hivyo kuna haja ya kuwa na chombo kinachosimamia bima za afya,” alisema.

Akitoa maelezo ya utangulizi, Mkurugenzi Mkuu wa Mfuko wa Taifa wa Bima ya Afya, Emanuel Humba, alisema kitendo cha Waziri kutembelea na kuzungumza na wafanyakazi kinaleta faraja kwa wafanyakazi lakini pia kuongeza juhudi ya utendaji zaidi hivyo akamwomba Waziri kutochoka kufanya hivyo mara kwa mara.