NHIF msiyumbishwe kwa namna yoyote-Wajumbe



Mjumbe wa Bodi ya Mfuko wa Taifa wa Bima ya Afya, Bw. Mukoba

 Na Mwandishi Wetu

WAJUMBE wa Bodi ya Mfuko wa Taifa wa Bima ya Afya (NHIF) wameupongeza uongozi wa Mfuko huo kwa kuwa imara na kuufikisha hapo ulipo ukiwa na mafanikio makubwa.

Kutokana na hali hiyo, wameutaka kuendekea kuwa imara na kutoyumbishwa kwa namna yoyote ili wanachama wake waendelee kunufaika na huduma bora zinazotolewa mpaka sasa.

Wakizungumza kwa nyakati tofauti Dar es Salaam juzi wakati wa sherehe ya kukaribisha mwaka 2012, walisema kuwa "Tunatambua uongozi wa Mfuko ni imara na ndio maana umeweza kuvuka mawimbi yote yaliyokuwepo na leo hii tunaona wanachama wakinufaika na mafao yaliyopo,"

"Yawezekana uimara huu unawezeshwa na aliyekikamata chombo hiki ambaye kwa kweli tuna kila sababu ya kumpongeza, uimara wake ndo unaowezesha hata haya mafanikio yaliyopo sasa," alisema Mjumbe wa Bodi, Gratian Mukoba.

Pamoja na kupongezwa kwa mafanikio yaliyofikiwa na Mfuko huo, mjumbe mwingine Prof. Joseph Shija hakusita kuwaelezwa watumishi wa Mfuko huo matumaini makubwa waliyonayo Watanzania katika Mfuko huo, hivyo akawataka kutobweteka na mafanikio yaliyofikiwa mpaka sasa na badala yake akawataka kuongeza bidii ya kazi kwa lengo la kuboresha zaidi.

"Siwezi nikashangaa kusikia mafanikio mengi ambayo mnayo mpaka sasa likiwemo la kupata Tuzo ya Kimataifa kutokana na ubora wa huduma zenu...najua kazi mliyoifanya katika kipindi hiki cha miaka 10 ni kubwa, msilewe sifa hizi ongezeni bidii katika kazi ili hatimaye mfikie lengo la afya bora kwa kila Mtanzania," alisema Prof. Shija.

Aidha aliwataka watumishi kufanya kazi kwa uadilifu na kuachana na utamaduni wa unung'unikaji lakini pia kuhakikisha wanajenga dhana ya kujiendeleza kitaaluma kwa lengo la kuongeza ufanisi katika utendaji kazi.

"Kamwe msiridhike na mlichonacho, ongezeni bidii na kujiendeleza ili utendaji uzidi kuwa bora zaidi na suala hili ili litekelezwe kwa ari, Mfuko unatakiwa kuwa na mpango wa kuwatunuku na kuwapa motisha watumishi bora kwa kila mwaka ili wengine waweze kuiga," alisema Prof. Shija.

Kwa upande wake Mkurugenzi Mkuu wa Mfuko huo, Emanuel Humba, aliwataka watumishi kutojiona wanyonge katika hatua ambayo Mfuko iko nayo kwani ni kubwa ikilinganishwa na mifuko mingine iliyoanza kabla ya Mfuko huo.

"Mtakumbuka tulianza na changamoto nyingi sana lakini sasa tuko pazuri...watu walidiriki kutuita 'njiti' lakini hilo hatukulijali kwani kuzaliwa njiti haina maana hata akili huna na ndio maana mpaka sasa tunafanya vizuri," alisema Humba.

Kutokana na hayo, alisema kuwa Mfuko umejipanga kuhakikisha unatoa elimu ya kutosha kwa umma ili huduma zinazotolewa na Mfuko zielewe na wananchi wote lakini pia wanachama wa Mfuko huo waweze kupata huduma za matibabu kwa heshima inayotakiwa.